Moopedi le raagwebo Cassper Nyovest o netefaleditšwe bjalo ka moswari wa moletlo wa difoka tša bo-32 tša South African Music Awards (SAMAs). Moletlo wo o tla swarelwa Sun City Superbowl profenseng ya Leboa Bodikela ka la 15 Phato.
Nyovest o tsebišitše ditaba tše ka bidio ye a e gahlanišitšego methopong ya gagwe ya ditaba tša leago. “Ke nyaka go re, bommma le borre, go sepmela ka semmuso.
Moshimane wa lena Cassper Nyovest, yo a tsebegago bjalo ka New Age Doc Shebeleza, ke moswari wa SAMAs ya ngwaga wo,” a realo.
O okeditše ka go re ditsebišo tše dingwe di tla latela dibekeng tše di tlang.
Nyovest o utollotše gape gore yena le ba SAMAs mafelelong ba rarolotše diphapang tša bona ka morago ga mo e ka bang mengwaga e lesome.
“Rena le ba SAMAs re bile le mathata a mantši. Ka morago ga mengwaga e 10 re sa bonane ka leihlo le le tee, ba nthušitše mme re fihleletše tumellano. Se e tla ba selo se segolo kudu,” a realo.
Leboa Bodikela le swere dikhatšo tše ntši tša SAMAs mme le tšewa bjalo ka lehae la setšo la difoka tše. MEC ya Leboa Bodikela ya Bokgabo, Setšo, Dipapadi le Boithabiso, Galebekwe Tsotso Tlhapi, o boletše gore profense e ikemišeditše go amogela moletlo wo gape.
