Seopedi sa mmino wa Hip-hop “Cassper Nyovest o itokišitše go bulela mootledi wa Uber molato ka morago ga go mo utswetša.
O belaela gore mootledi yo wa (Uber courier) o mmotša maaka ka ga mpho yeo a e rometšego mogwera wa gagwe.
Ka dipolelo tše a di dirilego phatlalatsa, Nyovest o hlalositše kwelobohloko ya gagwe ka khamphani yeo.
“Mpho ye ke e reketše mogwera waka ebile ke matšatsi a mararo, bjale ke gapeletšega go bula molato” arealo Cassper Nyovest.
O hlatsetše gape le gore mootledi yo wa Uber o boletše maaka gore mpho e fihlile go mogwera wa gagwe.
Cassper o okeditše gore mangwalo ao a ilego a a romela khamphaning a ile a se arabiwe ka diiri tše fetago tše 24.
Polelo ya gagwe e dirile gore batho ba bantši ba bolele kudu ka ga boikarabelo bja dikhamphani tša courier.
Le ge Nyovest a ile a emiša go bolela ka mapodisa pele gore Uber e mo fe karabo, o re matšatši a mararo a fetile ntle le tharollo.
