Mofenyi wa peleng wa Idols SA, Musa Sukwene, o lokolotše albamo ya gagwe ya bohlano ya studio, UHAMBO , ka yona nako ye a amogetšego ngwana wa gagwe wa boraro.
Se se mo tlišeditše lethabo la mošomo le la lapa ka nako e tee, ge gape a keteka mengwaga ye 13 ka intastering ya mmino.
Ge a bolela ka projeke ye, o hlalositše gore UHAMBO e emela sehla se bohlokwa bophelong bja gagwe.
O rile: “UHAMBO e bontšha leeto la ka, mafelo ao ke fetilego go ona, batho bao ke kopanego le bona, le dithuto tšeo ke ithutilego tšona.” Mantšu a gagwe a bontšha go ikwa a godile bjalo ka moopedi le motho.
Sukwene o boletše gore go ba monna le tate go fetošitše pono ya gagwe ka bophelo.
O gateletše gore bjale o nagana kudu ka boleng bjo a nyakago go bo fetišetša baneng ba gagwe le bohwa bjo a nyakago go bo tlogela.
O rile se se mo dira gore mmino wa gagwe o be wa nnete, o kwagala ka lerato, boikarabelo le kgolo.
Mabapi le mošomo, o re intasteri e mo rutile go tshepa leeto la gagwe.
O hlalošitše ka gore motho ga a swanela go ipapetša le ba bangwe ka gobane nako ya katlego e a fapana.
O boletše gape gore mathata le diphenyo ka moka di mo agile, gomme bjale o opela go kgokagana le batho le go phatlalatša molaetša wa lerato.
Albamo UHAMBO e akaretša tirišano le Soweto Gospel Choir, Thapelo Esua, Lawi, Bongani le Maraza.
Sukwene o re bašomišani ba ba tlišitše medumo le maatla a go fapana, gomme seo sa dira albamo e be leeto la nnete.
O letetše go e tliša sethaleng gore batheetši ba kwe dipina le dipale tša tšona ka botlalo.
