Mosadi wa tša dipapadi “Carol Tshabalala”, o tšwetše pele go bontšha bokgoni bja gagwe le ka ntle ga meedi ya Afrika Borwa.
Ke mosadi wa mathomo wa go gaša ka tša dipapadi ebile o bitšwa “First Lady of Sport”, bjale o ka gare ga karolo ya podcast ya “This Sporting Planet”.
Lenaneo le le lebiša tlhokomelo go ditaba tša dipapadi le setšo sa dipapadi tša go tšwa mafaseng a mangwe.
Carol o tla dira ponagalo ya gagwe ya mathomo le Natalie Sawyer wa Yuropa le Edward Russell wa go tšwa Asia.
“Re thabile kudu go amogela ‘First Lady of Sport,’ Carol Tshabalala go tšwa Afrika Borwa” ba realo geba mo amogela.
Ba boletše gape ka mokgwa wo e lego gore Tshabalala o tlo tliša bokgoni bja gagwe mo lenaneong le.
Carol Tshabalala e sego fela gore o tloga a beile leina la gagwe Afrika Borwa, eupša o šetše a emela basadi lefase ka bophara.
O nale maitemogelo a mengwaga e mentši mo dithelevišeneng tša Afrika Borwa ka FIFA World Cup, CAF Champions le tše dingwe.
